ក្រសួងអប់រំផ្អាកដំណើរការសាលាទាំងអស់នៅភ្នំពេញចំនួន ៣ថ្ងៃក្នុងខែវិច្ឆិកា ដើម្បីសម្រួលដល់កិច្ចប្រជុំអាស៊ាន
ភ្នំពេញ៖ ក្រសួងអប់រំបានសម្រេចផ្អាកដំណើរការគ្រឹះស្ថានសិក្សាសាធារណៈ និងឯកជន គ្រប់កម្រិត ក្នុងរាជធានីភ្នំពេញ ជាបណ្ដោះអាសន្ន ចំនួន ៣ថ្ងៃ ចាប់ពីថ្ងៃទី១០ រហូតដល់ថ្ងៃទី១២ ខែវិច្ឆិកា ឆ្នាំ២០២២ ដើម្បីសម្រួលដល់កិច្ចប្រជុំអាស៊ាន។
ក្នុងសេចក្ដីប្រកាសព័ត៌មានចុះថ្ងៃទី១២ ខែកញ្ញា ក្រសួងអប់រំបានបញ្ចាក់ថា ការផ្អាកដំណើរការគ្រឹះស្ថានសិក្សាអប់រំរយៈពេល៣ថ្ងៃនេះ គឺជួយកាត់បន្ថយនូវការស្ទះចរាចរណ៍ កាត់បន្ថយការរំខានដល់ប្រជាជននៅក្នុងរាជធានីភ្នំពេញ ក៏ដូចជាសម្រួលដល់ក្បួនរថយន្តរបស់គណៈប្រតិភូ ក្នុងអំឡុងពេលនៃកិច្ចប្រជុំកំពូលអាស៊ានលើក · ទី៤០ និងទី៤១ និងកិច្ចប្រជុំកំពូលពាក់ព័ន្ធ ដែលនឹងប្រព្រឹត្តទៅនៅថ្ងៃទី ១០-១៣ ខែវិច្ឆិកា ឆ្នាំ២០២២។
ក្រសួងក៏បានបញ្ចាដល់ មន្ទីរអប់រំ យុវជន និងកីឡារាជធានីភ្នំពេញ ត្រូវផ្សព្វផ្សាយឱ្យ នូវសេចក្ដីសម្រេចនេះដល់គ្រប់ការិយាល័យអប់រំ យុវជន និងកីឡានៃរដ្ឋបាលខណ្ឌ គណៈគ្រប់គ្រងគ្រឹះស្ថានសិក្សា បុគ្គលិកអប់រំ មាតាបិតា និងអ្នកអាណាព្យាបាលគ្រប់រូប ដើម្បីចូលរួមសហការអនុវត្តប្រកបដោយស្មារតីទទួលខុសត្រូវ៕